“Боотурдар көлүөнэлэрэ” бырайыак чэрчитинэн, чэпчэки атлетика Федерацията, өрөспүүбүлүкэ күүстээх сүүрүктэрэ, номоххо киирбит аҕам саастаах быһыйдара төгүрүк остуол тула мустан кэпсэттилэр. Төгүрүк остуол тула олорон кэпсэтиилэри Манчаары аатынан саха төрүт күрэс көрүҥнэригэр Киин дириэктэрэ, Ил Түмэн депутата Геннадий Васильев уонна “Сахаада-спорт” Ассоциация  президенэ Александр Ким-Кимэн салайан ыыттылар.

“Боотурдар көлүөнэлэрэ” программа чэрчитинэн Хотугу многоборье салайааччылара, тренердэр, спортсменнар кулун тутар 26 күнүгэр түмсэн төгүрүк остуол тула кэпсэттилэр. Ити күн сарсыардааҥҥы рейсинэн хотугу многоборецтар Ханты-Мансийскай уокурук Белоярскай куоратыгар түмүктэммит Россия чемпионатыттан иккис миэстэни ылан кэлбиттэрэ үөрүүлээх бэлиэ түгэнинэн буолла. Бу дьоһун бырайыагы көҕүлээбит “Сахаада-спорт” президенэ Александр Ким-Кимэн, Манчаары аатынан спорт национальнай көрүҥнэрин Киин дириэктэрэ Геннадий Васильев иилээн-саҕалаан ыыттылар. Дьоһун, дириҥ суолталаах сиһилии кэпсэтии таҕыста.

“Боотурдар көлүөнэлэрэ” программа чэрчитинэн хапсаҕайдьыттар төгүрүк остуол тула олорон кэпсэтиилэрин, ити бырайыагы көҕүлээччилэр “Сахаада-спорт” ассоциация президенэ Александр Ким-Кимэн, Манчаары аатынан саха төрүт күрэһин Киин дириэктэрэ Геннадий Васильев салайан ыыттылар. Кэпсэтии сыала-соруга хапсаҕай сайдыытыгар суолларын иистэрин хаалларбыт уонна билигин улахан түһүлгэлэргэ кыайыы-хотуу аргыстаах чулуу бөҕөстөр дьоһун ааттарын бар-дьоҥҥо, норуокка иһитиннэрии-билиһиннэрии, инники сайдыы суолларын тобулуу, баар итэҕэстэри туоратыыга этиилэри истии буоллулар. Кэпсэтиигэ Федерациялар салайааччылара,  бочуоттаах маастардар, биллиилээх хапсаҕайдьыттар көхтөөхтүк кытыннылар.

Саха төрүт оонньууларын сайыннарыыга тэрийэр-көҕүлүүр үлэ утумнаахтык ыытыллар. Манчаары оонньууларын көрсө “Сахаада-спорт” Ассоциация көҕүлээһининэн “Боотурдар көлүөнэлэрэ” бырайыак үлэтин саҕалаан, олоххо киллэриллэр. Саҥа Дьыл иннинэ сахалыы атах оонньуутун Федерацията түмсэ сылдьыбыта. Бу аҕыйах хонуктааҕыта хабылык-хаамыска оонньууларын Федерацията төгүрүк остуол тула түмсэн киэҥ кэпсэтиини ыытта. Сүрүн сыал-сорук: сахалыы остуол оонньууларын Россия уонна аан дойду таһымыгар таһаарыы.

Муус устар 30 күнүгэр “Модун” спорткомплекска “Боотурдар көлүөнэлэрэ” бырайыак чэрчитинэн, “Манчаары оонньууларын” көрсө, араас кэмнэргэ “Урожай” физкультурнай-спортивнай уопсастыбаҕа үлэлээбит салайааччылар, тэрийээччилэр төгүрүк остуол тула көрүстүлэр. Кэпсэтиигэ Саха Өрөспүүбүлүкэтин физическэй культураҕа уонна спорка миниистирэ Леонид Спиридонов кыттыыны ылла.

“Сахаада-спорт” ассоциация көҕүлээн саҕалаабыт “Боотурдар көлүөнэлэрэ” программа чэрчитинэн оҕунан ытыы Федерацията төгүрүк остуол тула түмүстэ.
Түмсүүнү ассоциация президенэ Александр Ким-Кимэн салайда. Саха сирин охчуттара Орел куоракка Россия чемпионатыгар уонна Кубогар мэтээллэрдээх кыттыбыттара ситиһии быһыытынан ахтылынна. Болҕомто төрүт оҕунан ытыы көрүҥэр туһаайылынна.