Тааттаттан Андрей Васильев куобахха бастаата

Атах оонньууларыгар куобахха күрэхтэһиини эр дьон салҕаатылар. Түмүктүүр көрүҥҥэ куобахха Тааттаттан успуорт маастара Андрей Васильев утарсааччыларын ырааҕынан хаалларан, 43 м 09 см түһэн, чөмпүйүөннээтэ.


Ньурбаттан успуорт маастара Эрэл Тихонов 40 м 53 см көрдөрүүлээх иккис миэстэҕэ таҕыста. Кылыыга уонна ыстаҥаҕа бастаабыт Горнай 1-кы хамаандатыттан Кай Адамов (39 м 35 см) үһүс буолла.  

 Үс көрүҥ түмүгүнэн Кай Адамов бастаата, Андрей Васильев иккис, ХИФУ-тан Ньургун Сокольников үһүс миэстэлэргэ таҕыстылар.

Кай Адамов эр дьоҥҥо үс көрүҥүнэн муҥутуур кыайыылааҕынан ааттанан, "Вилюйавтодор" ААУо олохтообут анал бирииһин - автомассыына хаһаайынынан буолла.   Куобахха күрэхтэһии мантан киэһэ уолаттар уонна бэтэрээннэр күөн көрсүһүүлэринэн түмүктэниэҕэ. 

Ulus Media