Саха төрүт оонньуулара Олимпиадаҕа тириэрдэр

Саха норуота киэн туттар спортсмена, XXI Олимпийскай Оонньуулар чемпионнара Павел Пинигин Манчаары оонньууларын туһунан кэпсиир.


Павел Пинигин:

–    Манчаары оонньуута Бэрдьигэстээххэ ыытыллыбыта олохтоохторго инникитин улахан көмөлөөх буолуо. Саҥа тутуулар, спортивнай саалалар, “Чыпчаал” стадион ыччаттарбыт чөл, доруобай эт-хаан өттүнэн сайдыылаах  буолалларыгар төһүү күүс буолуо. Оонньуу арыллыытын олус сэргии көрдүм. Билиҥҥи сайдыылаах кэми кытта сибээстээн, дириҥ ис хоһоонноох гына оҥорбуттара ыалдьыттары сөхтөрдө. Арассыыйа спорка миниистирэ Олег Матыцин, Арассыыйа Олимпийскай кэмитиэтин Президенэ Станислав Поздняков саха национальнай оонньууларыгар болҕомто ууран, кыттыыны ылбыттарыттан дьон-сэргэ олус үөрдэ.


Манчаары оонньуулара саха норуота былыр-былыргыттан күрэхтэһэн кэлбит спордун көрүҥнэрэ буолар. Номоххо кэпсэнэрин курдук былыр даҕаны улуус улууһунан күүстээхтэр, быһыйдар, хапсаҕайдьыттар күрэхтэһэллэрэ. Итинник үтүө үгэспитин тута сылдьар буоламмыт олимпийскай чыпчаалга тиийдибит.    Манчаары оонньуута быйыл 21-с төгүлүн ыытыллар. Иниикитин өссө сайдыахтаах диэн көрөбүн. Бастатан туран, маннык оонньуу ыытыллара улуус сайдыытыгар төһүү күүс буолар. Онон Горнайдарга ыарахан кэмҥэ ыарыыттан, баһаартан чаҕыйбакка,  спортивнай оонньуубут үрдүк тэрээһиннээхтик бара турарыгар улуус баһылыгар Никита Андреевка, бары тэрийээччилэргэ  махталбын тириэрдэбин.

Ulus Media