Манчаары уота Горнайга кэллэ

От ыйын 6 күнүгэр, Манчаары Баһылай төрөөбүт Арыылаах алааһыгар саҕыллыбыт уот ХХI Манчаары оонньуулара ыытыллыахтаах Горнай улууһун сиригэр-уотугар кэллэ. Оонньуу уотун горнайдарга экстремал сүүрүк Дмитрий Горохов салайааччылаах оонньуу уотун эстафетатын хамаандата аҕалла. Уоту "Горнай улуус" МО баһылыгын бастакы солбуйааччыта Сардаана Стручкова Дьокуускай к. физическэй култуураҕа уонна успуорка управлениетын салайааччытыттан Константин Бурцевтан тутта. Манна даҕатан этэр буоллахха, Маҕарас сэлиэнньэтин кэрэ аҥардара күн саҕаланыаҕыттан Горнай кыраныыссатын бастакы тохтобулугар оонньуу кыттыылаахтарын, ыалдьыттары алгыстаах алаадьынан, уохтаах кымыһынан айах туттулар. Салҕыы Манчаары уота Одуну нэһилиэгин сиригэр-уотугар биир хонон баран, оонньуу үөрүүлээх аһыллыытыгар Бэрдьигэстээххэ тиийиэҕэ. Саха норуотун бастыҥ уола Манчаары Баһылай көҥүлгэ эрэлэ кыымтан саҕыллан, умуллубакка үйэлэри уҥуордаан билигин да сылааһынан сыдьаайар.