«Манчаары оонньуулара»: ат сүүрдүүтүгэр чурапчылар бастаатылар

Бүгүн, от ыйын 9 күнүгэр, Бэрдьигэстээх ипподромун үөрүүлээх арыллыыта буолла. Манна бастакы күрэхтэһиинэн «Манчаары оонньууларын» бырагырааматыгар киирбит ат сүүрдүүтэ ыытылынна.
Ипподром арыллыытын сиэригэр-туомугар «Ил Түмэн» судаарыстыбаннай мунньаҕын бэрэссэдээтэлэ Алексей Еремеев, СӨ бырабыыталыстыбатын бэрэссэдээтэлин солбуйааччы Сергей Местников, СӨ Тыатын хаһаайыстыбатын миниистирэ Александр Атласов, СӨ Ат успуордун бэрэсидьиэнэ, норуот дьокутаата Руслан Федотов, СӨ Успуорка уонна физическэй култуураҕа миниистирэ Иннокентий Григорьев, ипподрому туппут тэрилтэлэр салайааччылара Владимир Винокуров, Иван Трофимов, Александр Федоров ыалдьыттаатылар. «Ил Түмэн» бэрэссэдээтэлэ Алексей Еремеев: «Дьокутааттар уонна тус бэйэм ааппыттан Горнай сиригэр-уотугар «Манчаары оонньуулара» буолбутунан эҕэрдэлиибин. Былыр-былыргыттан ат успуордун национальнай көрүҥмүт быһыытынан илдьэ кэлэн, маннык курдук саҥа ипподромнар тутуллар буолбуттара үөрдэр. «Манчаары оонньууларыгар» зачет биэрэр көрүҥ быһыытынан киирэн, улуустар сүүрэр аты булан, дьарыктаан, иитэн, ат успуорда сайдарыгар сыраларын уураллар. Дьокутаат, Ат федерациятын бэрэсидьиэнэ Руслан Федотов араас таһымнаах күрэхтэһиилэри үбүлээн тэрийэрэ кэрэхсэбиллээх», — диэн эҕэрдэ тылын эттэ. СӨ Бырабыыталыстыбатын бэрэссэдээтэлин солбуйааччы, «Манчаары оонньууларын» тэрийэр кэмитиэт бэрэссэдээтэлэ Сергей Местников: «Манчаары оонньууларын» биир сүрүн түһүлгэтинэн ат сүүрдүүтэ буолар. Онон хас биирдии оонньуулары ыытар улууска саҥа ипподром тутуллан, ат сүүрдүүтүгэр бу хамсааһын сайдыыны биэриэ этэ. Бэрдьигэстээх ипподромугар буолар сүүрдүүлэр кэрэ бэлиэ түгэннэри бэлэхтээтиннэр», — диэн санаатын эттэ.
Күрэхтэһиигэ ыраас хааннаах уонна саха аттара, Саха сиригэр төрөөбүт аттар диэн арахсан, 1600 м, 2400 м, 3200 м, 4800 м уһуннарга сүүрдүлэр. Таһымнаах сүүрдүүлэр лиидэрдэрэ кыттан, күрэхтэһии өссө тыҥааһыннаммыта саарбахтаммат.
Түмүк 1600 миэтэрэҕэ Саха сиригэр төрөөбүт сылгыларга: 1 — Амматтан Найт Шот (1.44.9) 2 — Мэҥэ Хаҥаластан Атланта (1.47.28) 3 — Горнайтан Блэк Грек (1.48.26)  
1600 миэтэрэҕэ ыраас хааннаах сылгыларга аһаҕас сүүрүүгэ: 1 — Чурапчыттан Ютон Барс (1.39.92) 2 — Хаҥалас Совьет Серф (1.41.46) 3 — Мэҥэ Хаҥаластан Блэк Джет (1.42.09)  
3200 миэтэрэҕэ Саха сиригэр төрөөбүт ыраас хааннаах аттар сүүрүүлэригэр: 1 — Амматтан Гоин Ап (3.50.51) 2 — Чурапчыттан Арылхан (3.50.78) 3 — Үөһээ Бүлүүттэн Голден Асс (3.51.07)
   4800 миэтэрэҕэ саха сылгыларын сүүрүүлэригэр: 1 — Хаҥаластан Кэскил (6.35.26) 2 — Чурапчыттан Бэлэх (6.37.11) 3 — Намтан Кустук (6.45.41)
  2400 миэтэрэҕэ саха сылгыларын сүүрүүлэригэр: 1 — Горнайтан Эйр Бен Барс (2.36.34) 2 — Чурапчыттан Майн Кениг (2.37.78) 3 — Мэҥэ Хаҥаластан Магриб (2.38.2)
Хамаанданан түмүк маннык буолла: 1 миэстэ — Чурапчы улууһа, 2 миэстэ — Мэҥэ Хаҥалас улууһа, 3 миэстэ — Хаҥалас улууһа.

Пресс-центр Игр Манчаары