Кынаттаах кылыыһыт Сергей Кривошапкин: "Кыайыыбын төрөөбүт улууспар аныыбын"

Сахалыы атах оонньуутун сэҥээрээччилэр Кэбээйи улууһун Сэбээн Күөлүттэн төрүттээх Сергей Кривошапкины үчүгэйдик билэр буолуохтаахтар. Сергей 1999 с. Ытык Күөлгэ ыытыллыбыт Манчаары оонньуутугар аан бастаан кыттыбыта. Дьэ итинтэн ыла кынаттаах кылыыһыт соргулаах спортивнай суола аһыллыбыта.



 От ыйын 10 күнүгэр атах оонньууларыгар бэтэрээннэргэ күрэхтэһии түмүктэннэ. Манна үс көрүҥ түмүгүнэн Сергей Кривошапкин үрүҥ көмүс мэтээл хаһаайына буолла. Сергейи эҕэрдэлээн баран, санаатын үллэстэригэр көрдөстүм.

 – Бу алтыс Манчаарым оонньуулара, – диир Сергей. – Кыттыам диэн эрдэттэн сыал-сорук туруоруммутум. Ол эрээри командировкабыт элбэх, дьарыгым ситэтэ суох курдук этэ. Нэһиилэ быыс булан дойдубар Сэбээҥҥэ кэлэн дьарыктаммытым. Бэҕэһээ күн түмүгүнэн кылыыга уонна ыстаҥаҕа икки миэтирэнэн хаалан испитим, бүгүн куобахха икки миэтирэнэн чорбойон таҕыстым. Онон улууһум хамаандатыгар үс көрүҥ түмүгүнэн үрүҥ көмүс мэтээли, уопсайа түөрт мэтээли аҕалбыппыттан олус үөрдүм. "Кэбээйилэр – үрдүккэ!" девизпит чахчы киһини өрө күүрдэр эбит.

 – Атах оонньууларыттан хайа көрүҥү ордороҕун?

 – Эдэр эрдэхпинэ кылыыны себүлүүр этим. Билигин сааһырбычча куобахха кестүм. Ол да курдук бүгүн быһаарыылаах очкону куобаҕым тэптэ.

 – Аан бастаан хас сыллаахха кыттыбыккыный?

 – 1999 с. Ытык Күөлгэ аан бастаан кыттан боруонса мэтээли ылбытым. Ол кэнниттэн 2001 с. Хаандыгаҕа буолбут Саха сирин норуоттарын спортивнай оонньууларыгар 47 м. 60 см ыстанан, рекорд олохтообутум. Онтон ыла бу алтыс бүтэһик Манчаарыбар кытта сылдьабын. Мантан антах шиповкабын тоһоҕоҕо ыйыырым буолуо. Спорка суолу арыйан биэрбит таптыыр спартакиадабын хайаан да мэтээллээх түмүктүөхтээхпин, дойдум хамаандатыгар мэтээл аҕалыахтаахпын диэн туох баар күүспүн-кыахпын барытын ууран туран кииристим. Хамаандам дьонун, биир дойдулаахтарым өйөбүллэрэ күүс-көмө буолла.
 Түгэнинэн туһанан, улууһум баһылыгар Иван Левинҥэ, спортуправление начаалынньыга Алексей Сыроватскайга уонна Иннокентий Колесовка күрэхтэһиигэ кыттар усулуобуйаны тэрийбиттэригэр улахан махталбын тиэрдэбин. 


 Источник: Ulus media