Бүлүү хамаандата хотугу многоборьеҕа икки мэтээли ылла

Бүгүн, от ыйын 10 күнүгэр, Бэрдьигэстээххэ саҥа спортивнай кииҥҥэ ыытыллыбыт хотугу многоборье наартаны ойууга күрэхтэһиитигэр дьахталларга Любовь Слепцова боруонса уонна бэтэрээннэргэ Петр Калачиков үрүҥ көмүс мэтээллэри ыллылар. Бу иннинэ Петр Калачиков тайах мастаах 3 км ыраахха сүүрүүгэ үрүҥ көмүс уонна маамыктаны быраҕыыга боруонса мэтээллэри ылбыта. Бүгүн наартаны 290 ойон күрэхтэһиини иккис көрдөрүүлээх түмүктээтэ


Спорт маастара Любовь Слепцова хотугу многоборьенан дьарыктаммыта 5 сылыгар барда. Оҕо сылдьан тустуунан дьарыктанан “Азия оҕолоругар” 2012 сыллаахха 34 киилэ ыйааһыҥҥа чемпионнаабыта.



XXI “Манчаары оонньууларын” спартакиадатыгар үһүс миэстэни ылбыт Любовь Слепцова пандемия кэмигэр хайдах дьарыктаммытын бу курдук кэпсээтэ:   - Кыһын дьарыгы көтүппэккэ сылдьыбытым, быыс буллум да саала үлэлээбэт кэмигэр таһырдьа сүүрэрим, бэлэмнэнэрим. Бу сырыыга наартаны ойууга 304 ыстанным. Тириэньэрбэр Григорий Егорович Васильевка махтанабын!

Любовь Слепцова уонна Петр Калачиков дьаныардаахтык үлэлээн 4 сылга биирдэ ыытыллар “Манчаары оонньууларын” призердарынан буоллулар!   Боруонса мэтээли ылбыт Любовь Слепцованы уонна үс мэтээли ылары ситиспит Петр Калачиковы истиҥник эҕэрдэлиибит, бары үчүгэйи, спорт ыарахан көрүҥэр саҥа ситиһиилэри баҕарабыт!

Ulus Media