Манчаары албан аата үйэлэри уҥуордаан

"Саха сатаабатаҕа суох" диэн этии баар. Бу Манчаары оонньууларын аһыллыытын үөрүүлээх дьүһүйүүтүгэр быһаччы сыһыаннаах диэтэхпитинэ, бука сыыспаппыт буолуо. Театрализованнай дьүһүйүү режиссера Руслан Тараховскай, сценарист Яна Байгожаева. Саха норуотун чулуу уолаттара Сэмэн уонна Софрон Даниловтар норуоттарын барҕарыы суолугар сирдиир ыра санаалара, дьулуспут дьулуһуулара бу күн туолбукка дылы буолла. Сиинэ Эбэ мааны балтын Мааттаны баттаҕыттан ууруу-сыллыы, холкутук кутугуната хоонньугар уктан уоскутара, биитэр уол оҕо ыытыллыбыт оноҕоһун тойуга кэскил диэкки дьулуһуута барыта баардыы көһүннэ. Саха норуотун сайдыытыгар олук буолар биэс сүрүн хайысха: экономика, наука, промышленность, экология, искусство дьүһүйүү сүрүн концепцията буолбута көрөөччүлэри ордук умсугутта. Маны барытын сүүһүнэн кыттааччы биир киһи курдук тэҥҥэ, кэһилтэтэ суох тиэртэ. "Оо, үчүгэйин эриэхсит!" диэн саҥа эрэ аллайаҕын. Түҥ кэмнэртэн эрэллээх сарсыҥҥы ситимэ быстыбакка баран иһэрин көрөн астына үөрэҕин. Быыра ох уонна балысхан сайдыы, инновация! Маны барытын көрө-истэ олорон "Көр эрэ. Биһиги да умса түстэхпитинэ сүүспүтүттэн өйүүр, тиэрэ түстэхпитинэ кэтэхпититтэн тутар чөл, чэгиэн ыччаттардаах эбиппит ээ!" дии искэр астына саныыгын. Чөл, чэгиэн норуот эрэ сырдыкка, ырааска талаһар аналлаах. Ол туоһута куһаҕантан күндүнү араарар, сибэккини, күнү, дьолу бас билэр таптал, ийэ дойдуга, дьоҥҥо таптал буолар. Ол иһин Манчаары маҥан ата, Манчаары албан аата күлүгүрбэт, кэхтибэт эбит.  
Силатруда.РФ