«МАНЧААРЫ ООННЬУУЛАРА»: МНОГОБОРЕЦ АЙСЕН ЕЛИСЕЕВ БЭЙЭТИН ЫЙААҺЫНЫГАР ТУТУМ ЭРГИИРГЭ БАСТЫҤ КӨРДӨРҮҮЛЭННЭ

Дьокуускай куорат хамаандатыттан национальнай многоборьеҕа күрэхтэһэр Айсен Елисеев тутум эргиир көрүҥэр икки мүнүүтэҕэ 64-э эргийэн, бу түһүмэххэ 70 киилэҕэ диэри ыйааһыҥҥа бастыҥынан ааттанна. Айсен «Манчаары оонньууларын» түһүлгэтигэр бэйэтин рекордун ситтэ. Бу иннинэ дьарыкка 63-э эргийэр эбит. Спортсмен 2001 сыллааха Дьокуускайга төрөөбүт, Чурапчы Чыаппаратыгар оскуолатыгар үөрэммит. Оттон билигин ХИФУ физкултуурунай институтун иккис кууруһун бүтэрбит. Айсен дьарыгын, бэлэмин туһунан биһиги ааҕааччыларбытыгар анаан маннык кэпсээтэ: — Мин «Боотур» спортивнай кулуупка Иван Белолюбскайга дьарыктаммытым икки сыл буолла. Тутум эргииргэ имигэс уонна тулуурдаах буолуохха наада дии саныыбын. Күн аайы анал бырагырааманы тутуһан дьарыктанабын. «Манчаары оонньууларыгар» туох баарбынан киирсэбин, улаханнык долгуйбаппын. Ыйааһыммар барыта да күүстээх, кыахтаах уолаттар кытта сылдьаллар. Мин саамай табыллар көрүҥмүнэн тутум эргиирин ааттыыбын. Манна диэн эттэххэ, тутум эргииригэр өрөспүүбүлүкэ рекордсменынан Кэбээйи спортсмена Алексей Уваровскай буолар. Кини икки сыллааҕыта многоборьеҕа өрөспүүбүлүкэ чөмпүйэнээтигэр 71-дэ эргийэн турардаах. Оттон биһиги сэһэргэһээччибит Айсен Елисеев ааспыт ый бүтүүтэ «Дыгын оонньууларыгар» кыттан, үчүгэй түмүктэри көрдөрбүтэ. Эдэр кэскиллээх спортсмеҥҥа ситиһиилэри баҕарабыт! XXI «Манчаары оонньуулара» пресс -киинэ